ខេត្តកណ្ដាល៖ បន្ទាប់ពីទទួលបានព័ត៌មាន មានកម្មករ កម្មការិនីចំនួន៣ នាក់ វិជ្ជមានជំងឺកូវីដ-១៩ ហើយក្នុងនោះមានមួយករណីជាប្រភេទជំងឺកូវីដ-១៩ ប្រភេទថ្មី(Delta) នៅរសៀលថ្ងៃទី២៧ ខែសីហា ឆ្នាំ២០២១នេះ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល បានចាត់តាំងឲ្យឯកឧត្តម ណុប ដារ៉ា អភិបាលរងខេត្ត ដឹកនាំក្រុមការងារ មន្ត្រីជំនាញ រួមជាមួយអាជ្ញាធរស្រុកអង្គស្នួល ចុះស្រាវជ្រាវស្វែងរកអ្នកដែលបានប៉ះពាល់ដោយផ្ទាល់ និងប្រយោល ដើម្បីយកសំណាកធ្វើតេស្តរកមេរោគកូវីដ-១៩ និងធ្វើចត្តាឡីស័កឲ្យបានត្រឹមត្រូវតាមវិធានរបស់ក្រសួងសុខាភិបាល ដើម្បីកាត់ផ្ដាច់នូវការចំលងចូលក្នុងសហគមន៍។
ឯកឧត្តម ណុប ដារ៉ា អភិបាលរងខេត្តកណ្ដាល បានឲ្យដឹងថា បុរសម្នាក់អាយុ៣៧ឆ្នាំ មានវិជ្ជមានមេរោគកូវីដ-១៩ ប្រភេទថ្មី ដែលតា (Delta) មានមុខរបរកម្មកររោងចក្រមួយ ស្នាក់នៅភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល។ តាមការពិនិត្យ និងស្រាវជ្រាវ បានរកឃើញមានអ្នកពាក់ព័ន្ធដោយផ្ទាល់ និងប្រយោលសរុបចំនួន ១៩៦នាក់(អ្នកប៉ះពាល់ផ្ទាល់ចំនួន ៣៥នាក់ និងប៉ះពាល់ប្រយោល ចំនួន ១៦១នាក់ )។
ឯកឧត្តមអភិបាលរងខេត្ត បន្តថា ដើម្បីធានានូវសុវត្ថិភាព និងកាត់ផ្ដាច់នូវខ្សែចម្លងចូលសហគមន៍ ពិសេសជៀសវាងការឆ្លងទៅក្រុមគ្រួសារ អ្នកដែលប៉ះពាល់ដោយផ្ទាល់ និងប្រយោលទាំង ១៩៦ នាក់ ត្រូវយកសំណាកធ្វើតេស្តរកមេរោគកូវីដ-១៩ ឲ្យបានគ្រប់គ្នា។ ឯកឧត្តម ឲ្យដឹងទៀតថា ក្រោយពីការធ្វើតេស្តយកសំណាក កម្មករចំនួន ១៩៦នាក់ ខាងលើ លទ្ធផលគឺពុំមានអ្នកវិជ្ជមាន នោះទេ (អវិជ្ជមានទាំងអស់)។
ឯកឧត្តមក៏បាន បន្ថែមទៀតថា បើទោះជាលទ្ធផលមិនមានវិជ្ជមានក៏ដោយក្ដី តែអ្នកដែលប៉ះពាល់ដោយផ្ទាល់ និងប្រយោល ត្រូវធ្វើចត្តាឡីស័កឲ្យបានត្រឹមត្រូវតាមវិធានរបស់ក្រសួងសុខាភិបាល ហើយក្នុងកំឡុងពេលនៃការធ្វើចត្តាឡីស័ក បងប្អូនកម្មករ កម្មការិនី ទាំងអស់ ត្រូវតាមដានសុខភាពជាប្រចាំ ក្នុងករណីមានការសង្ស័យទៅរាយការណ៍ទៅអាជ្ញាធរមូលដ្ឋាន ពិសេសក្រុមគ្រូពេទ្យជំនាញដែលនៅជិតបំផុត។
![](https://asset.cambodia.gov.kh/provincial/sites/29/2021/08/240475887_4097474643714077_6449033004088494309_n-1024x682.jpg)
![](https://asset.cambodia.gov.kh/provincial/sites/29/2021/08/236185704_4096902767104598_4043229611552300106_n-1-1024x682.jpg)
![](https://asset.cambodia.gov.kh/provincial/sites/29/2021/08/236185704_4096902767104598_4043229611552300106_n-1-1024x682.jpg)
![](https://asset.cambodia.gov.kh/provincial/sites/29/2021/08/238620159_4097474530380755_2486616074168828753_n-1024x682.jpg)
![](https://asset.cambodia.gov.kh/provincial/sites/29/2021/08/235654262_4097474817047393_3046667305985746506_n-1024x682.jpg)
![](https://asset.cambodia.gov.kh/provincial/sites/29/2021/08/235668140_4097476480380560_70336346274508494_n-1024x682.jpg)