++++++++++++ខេត្តកណ្តាល៖ ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល បានអញ្ជើញសំណេះសំណាលជាមួយនាយទាហាន នាយទាហានរង ពលទាហាន នៃបញ្ជាការដ្ឋានកងអង្គរក្ស ស្ថិតក្នុងភូមិទួលក្រសាំង សង្កាត់តាខ្មៅ ក្រុងតាខ្មៅ នាឱកាសបុណ្យចូលឆ្នាំប្រពៃណីជាតិខ្មែរ នាព្រឹកថ្ងៃទី១៦ ខែមេសា ឆ្នាំ២០២៦នេះ។ មានមតិសំណេះសំណាល ឯកឧត្តមអភិបាលខេត្ត បានសម្តែងនូវការកោតសរសើរដោយស្មោះចំពោះស្មារតីលះបង់ខ្ពស់របស់នាយទាហាន នាយទាហានរង និងពលទាហានទាំងអស់ ដែលបានបំពេញភារកិច្ចការពារសន្តិសុខ សណ្តាប់ធ្នាប់ និងការពារថ្នាក់ដឹកនាំជាន់ខ្ពស់របស់ជាតិបានយ៉ាងល្អប្រសើរ។ ឯកឧត្តមបានបញ្ជាក់ថា៖ កងអង្គរក្ស គឺជាកម្លាំងស្នូលដ៏មានសារៈសំខាន់ក្នុងការធានានូវសន្តិភាព និងស្ថិរភាព ដែលជាគ្រឹះមិនអាចខ្វះបានសម្រាប់ការអភិវឌ្ឍខេត្ត ក៏ដូចជាប្រទេសជាតិទាំងមូល។​ក្នុងឱកាសនោះដែរឯកឧត្តមបានថ្លែងអំណរគុណដល់កងកម្លាំងនៃបញ្ជាការដ្ឋានកងអង្គរក្ស ដែលជានិច្ចកាលតែងតែសហការជាមួយ គណៈបញ្ជាការឯកភាពរដ្ឋបាលខេត្តកណ្តាល ក្នុងការថែរក្សាសន្តិសុខសណ្ដាប់ធ្នាប់និងការជួយសង្គ្រោះប្រជាពលរដ្ឋរងគ្រោះដោយទឹកជំនន់ អគ្គីភ័យជាដើម នាពេលកន្លងមកបានយ៉ាងល្អប្រសើរ។ ឯកឧត្តមបានសំណូមពរដល់បញ្ជាការដ្ឋានអង្គរក្ស សូមបន្តកិច្ចសហការគ្នាជាមួយរដ្ឋបាលខេត្តដើម្បីចូលរួមថែរក្សាសន្តិសុខសណ្ដាប់ធ្នាប់ និងជួយសង្គ្រោះប្រជាពលរដ្ឋ ពេលមានគ្រោះមហន្តរាយ ផ្សេងៗកើតឡើងបានទាន់ពេលវេលា។​ ជាមួយគ្នានេះដែរ ឯកឧត្តមអភិបាលខេត្ត ក៏បានឧបត្ថម្ភនូវ៖ ទឹកសុទ្ធ ភេសជ្ជៈ និងថវិកាមួយចំនួន ឧបត្ថម្ភដល់ បញ្ជាការដ្ឋានអង្គរក្ស សម្រាប់ប្រើប្រាស់ និងដើម្បីជាការលើកទឹកចិត្តក្នុងឱកាសចូលឆ្នាំថ្មីប្រពៃណីជាតិខ្មែរផងដែរ។