+++++++++++ខេត្តកណ្តាល៖ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល នៅរសៀលថ្ងៃទី២៤ ខែកុម្ភៈ ឆ្នាំ២០២៦ បានដឹកនាំក្នុងកិច្ចប្រជុំប្រមូលតម្រូវការគម្រោងសកម្មភាព នៃកម្មវិធីវិនិយោគបីឆ្នាំរំកិលខេត្ត (២០២៧-២០២៩) ដោយមានការអញ្ជើញចូលរួមពីអភិបាលក្រុង-ស្រុកទាំង១៣ និងមន្ទីរអង្គភាពពាក់ព័ន្ធផងដែរ។ថ្លែងបើកកិច្ចប្រជុំ ឯកឧត្តម គួច ចំរើន បានបញ្ជាក់ថា កិច្ចប្រជុំនេះ មានគោលបំណងសំខាន់គឺដើម្បី ណែនាំដល់រដ្ឋបាលក្រុង-ស្រុក និងមន្ទីរអង្គភាពពាក់ព័ន្ធ ទៅលើការងាររៀបចំ និងកំណត់តម្រូវការគម្រោងវិនិយោគ ជាអាទិភាពរបស់ប្រជាពលរដ្ឋ សម្រាប់ជាមូលដ្ឋានក្នុងការរៀបចំផែនការយុទ្ធសាស្ត្រថវិកាខេត្ត និងសម្រាប់ប្រើប្រាស់ជាធាតុចូលដល់ មន្ទីរ អង្គភាព ក្នុងការរៀបចំផែនការយុទ្ធសាស្ត្ររបស់ខ្លួនបានកាន់តែល្អប្រសើរឡើង។ឯកឧត្តមអភិបាលខេត្ត បានបញ្ជាក់បន្ថែមថា រាល់សំណើគម្រោងទាំងឡាយដែល រដ្ឋបាលក្រុង-ស្រុក និងអង្គភាពពាក់ព័ន្ធលើកឡើង ត្រូវយកចិត្តទុកដាក់ធ្វើយ៉ាងណាឱ្យសមស្របតាមលក្ខណៈវិនិច្ឆ័យ ដែលបានកំណត់ក្នុងសៀវភៅណែនាំបច្ចេកទេស។ ជាងនេះទៅទៀតសំណើគម្រោងវិនិយោគ ត្រូវរៀបចំ និងស្នើឡើងដោយផ្អែកលើលក្ខណៈវិនិច្ឆ័យ រួមមាន៖ ទី១. ស្របនឹងក្របខ័ណ្ឌអភិវឌ្ឍន៍ មានន័យថា គម្រោង ឬសេវា ដែលឆ្លើយតបទៅនឹងគោលបំណង គោលដៅ និងដំណោះស្រាយក្នុងក្របខ័ណ្ឌអភិវឌ្ឍន៍ របស់ផែនការអភិវឌ្ឍន៍រយៈពេល៥ឆ្នាំរបស់រដ្ឋបាល ខេត្ត ក្រុង ស្រុក ឃុំ សង្កាត់។ ទី២. ស្ថិតក្នុងដែនសមត្ថកិច្ច គឺជាគម្រោង ឬសេវា ដែលស្ថិតនៅក្នុងដែនសមត្ថកិច្ចរបស់ រដ្ឋបាលខេត្ត ក្រុង ស្រុក ឃុំ សង្កាត់។ ទី៣. ស្ថិតក្នុងអន្តររដ្ឋបាលដែនដី គឺជាគម្រោង ឬសេវា ដែលមានលក្ខណៈអន្តររដ្ឋបាលក្រុង ស្រុក សម្រាប់គម្រោងថ្នាក់ខេត្ត និងមានលក្ខណៈអន្តររដ្ឋបាលឃុំ សង្កាត់ សម្រាប់ គម្រោងថ្នាក់ក្រុង ស្រុក និងទី៤. កំណត់អតិបរមាលើចំនួនគម្រោង គឺត្រូវកំណត់យកគម្រោងតាមចំនួន ដែលអាទិភាព ករណីមានការស្នើឡើងច្រើន។បន្ថែមពីលើនេះ ឯកឧត្តមអភិបាលខេត្ត បានស្ទើរដល់ក្រុមការងារទាំងអស់ ចំពោះការរៀបចំដំណើរការកសាងកម្មវិធីវិនិយោគបីឆ្នាំរំកិល ត្រូវគោរពឱ្យបាននូវគោលការណ៍ទាំង ៩ចំណុច ៖ ១.ការចែករំលែកព័ត៌មាន ២.តម្លាភាព ៣.សង្គតិភាព ៤.ការចូលរួមពីគ្រោះយោបល់ជាទូទៅ ៥.ការឆ្លើយតបនឹងតម្រូវការ ៦.គណនេយ្យភាពសង្គមតាមបែបប្រជាធិបតេយ្យ ៧.ប្រសិទ្ធភាព និងសុក្រឹតភាពសេដ្ឋកិច្ច និងសង្គម ៨.ការធានាចីរភាពធនធានធម្មជាតិ និងបរិស្ថាន និង៩.ការធានាសមធម៌។ ជាមួយគ្នានេះដែរ ឯកឧត្តមអភិបាលខេត្ត បានក៏បានក្រើនរំលឹកដល់ក្រុង-ស្រុក និងមន្ទីរពាក់ព័ន្ធ ត្រូវបន្តយកចិត្តទុកដាក់ និងគិតគូទៅលើគម្រោងសាងសង់ផ្លូវចេញពីខេត្តទៅកាន់ក្រុង-ស្រុក ឃុំ-សង្កាត់ ផ្លូវទៅទីផ្សារវត្តអារាម ទីប្រជុំជន និងសាលារៀនឱ្យបានច្រើនខ្វាត់ខ្វែង សូមអង្គប្រជុំទាំងមូលត្រូវខិតខំយកចិត្តទុកដាក់ប្រមូលនៅធាតុចូលពីបណ្តាមន្ទីរអង្គភាពពាក់ព័ន្ធក្នុងកិច្ចប្រជុំ ក្នុងការស្នើរសុំគម្រោងនានាឱ្យបានសមរម្យ សមស្របទៅតាមភាពលទ្ធភាពជាក់ស្ដែង។ មួយវិញទៀត ត្រូវធ្វើការជាក្រុមក្នុងការបំពេញក្នុងគ្រប់តារាងគម្រោងដែលបានកំណត់ ដោយត្រូវពិនិត្យមើលតួលេខ ទិន្នន័យ ការប៉ាន់ស្មាន ឱ្យបានត្រឹមត្រូវ ត្រូវមានកិច្ចប្រជុំត្រួតពិនិត្យគម្រោងដែរជាតំរូវការនៅមូលដ្ឋានរបស់ខ្លួនឱ្យបានគ្រប់ជ្រុងជ្រោយប្រកបដោយការទទួលខុសត្រូវ មុនចុះហត្ថលេខា ផ្ញើមកខេត្តឱ្យបានត្រឹមថ្ងៃ២០ ខែមិនា ដើម្បីដាក់ឆ្លងក្រុមប្រឹក្សាខេត្តធ្វើការអនុម័តបានទាន់ពេលវេលា។