+++++++++++ ខេត្តកណ្តាល៖ នាព្រឹកថ្ងៃទី០២ ខែកញ្ញា ឆ្នាំ២០២៥ ឯកឧត្តម ប្រាក់ សារ៉ាត អភិបាលរងខេត្តកណ្តាល និងលោកជំទាវ នួន នារតី សមាជិកក្រុមប្រឹក្សាខេត្តកណ្តាល និងជាប្រធាន គ.ក.ស.ក ខេត្ត អញ្ជើញជាធិបតី ក្នុងពិធីបើកវេទិកាឆ្លុះបញ្ចាំងប្រចាំឆ្នាំ របស់អ្នកសម្របសម្រួលគណនេយ្យភាពសហគមន៍ ដោយមានការចូលរួមពី លោក-លោកស្រី អ្នកសម្របសម្រួលគណនេយ្យភាពសហគមន៍ និងអង្គការជាដៃគូរជាង ៤៤៧ នាក់។ឯកឧត្តម ប្រាក់ សារ៉ាត អភិបាលរងខេត្តកណ្តាលបានមានប្រសាសន៍ថា៖ក្នុងការអនុវត្តគោលនយោបាយវិមជ្ឈការ វិសហមជ្ឈការ ច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ និងច្បាប់ស្តីពីការ បោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ សំដៅលើកកម្ពស់ការផ្តល់សេវាសង្គម គណនេយ្យភាពសង្គម និងការអភិវឌ្ឍតាមបែបប្រជាធិបតេយ្យ ប្រកបដោយបរិយាប័ន្នសមធម៌ និងយុត្តិធម៌ តាមរយៈការធ្វើទំនើបកម្មប្រព័ន្ធអភិបាលកិច្ចថ្នាក់ក្រោមជាតិ និងការកែលម្អនូវដំណើរការផ្តល់សេវា និងគុណភាពសេវា ដើម្បីរួមចំណែកលុបបំបាត់ភាពក្រីក្រ លើកកម្ពស់គុណភាពជីវិត របស់ប្រជា ពលរដ្ឋឱ្យកាន់តែល្អប្រសើរ។ឯកឧត្តម ប្រាក់ សារ៉ាតបានបន្តថា៖ វេទិកាឆ្លុះបញ្ចាំងប្រចាំឆ្នាំរបស់អ្នកសម្របសម្រួលគណនេយ្យភាពសហគមន៍ មានសារៈសំខាន់ណាស់ ហើយនឹងផ្តល់ឱ្យយើងបានយល់ដឹងយ៉ាងច្បាស់នូវចំណុចខ្លាំង ចំណុចខ្វះខាត បញ្ហាប្រឈមនានា ស្តីពីការអនុវត្តគណនេយ្យភាពសង្គមកន្លងមក និងលើកទិសដៅសម្រាប់អនុវត្តគម្រោង ឱ្យទទួលបានជោគជ័យ ព្រមទាំងលើកទឹកចិត្តឱ្យមានការចូលរួមពីគ្រប់ភាគីពាក់ព័ន្ធ រួមមានវិស័យ សាធារណៈ អង្គការជាតិ អន្តរជាតិ សង្គមស៊ីវិល វិស័យ ឯកជន និងប្រជាពលរដ្ឋ ដើម្បីឱ្យមានការផ្លាស់ប្តូរជាវិជ្ជមានក្នុងសកម្មភាពអភិវឌ្ឍន៍របស់ស្ថាប័ន និងអង្គភាពនីមួយៗប្រកបដោយប្រសិទ្ធិភាព តម្លាភាព និងការទទួលខុសត្រូវខ្ពស់។សូមបញ្ជាក់ដែរថា វេទិកានេះ មានគោលបំណងដើម្បីឆ្លុះបញ្ចាំងអំពីវឌ្ឍនៈភាព បញ្ហាប្រឈម ដំណោះស្រាយ និងការផ្តល់ឱកាសដល់អ្នកចូលរួមបានដកស្រង់បទពិសោធន៍ ផ្លាស់ប្តូរចំណេះដឹង ស្ដីពីការអនុវត្តការងារគណនេយ្យភាពសង្គម និងការអនុវត្តយន្តការបណ្តាញ អ្នកសម្របសម្រួលគណនេយ្យភាពសហគមន៍ ដើម្បីសម្របសម្រួលនៃដំណើរការអនុវត្តផែនការយុទ្ធសាស្ត្រ ស្តីពីការងារគណនេយ្យភាពសង្គមសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។