គណៈកម្មការរៀបចំការបោះឆ្នោតខេត្តកណ្ដាលធើ្វសន្និបាតបូកសរុបការងារបោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី៥ ឆ្នាំ២០២២ +++++++++++++++ខេត្តកណ្ដាល ៖ ព្រឹកថ្ងៃទី២៤ ខែមិថុនា ឆ្នាំ២០២២ គណៈកម្មការរៀបចំការបោះឆ្នោត ខេត្តកណ្ដាល បានធើ្វសន្និបាតបូកសរុបការងារបោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី៥ ឆ្នាំ២០២២ ក្រោមគណៈអធិបតីភាព ឯកឧត្ដម ណុប ដារ៉ា អភិបាលរងខេត្តកណ្ដាល និងលោក គីម ហុង ប្រធាន គ.ជ.ប ខេត្តកណ្ដាល ព្រមទាំងមានការអញ្ជើញចូលរួមពីប្រធានមន្ទីរអង្គភាពជុំវិញខេត្ត កងកម្លាំងទាំងបី និងគណៈកម្មការរៀបចំការបោះឆ្នោតទាំង ១២៧ឃុំ សង្កាត់ផងដែរ។ លោក គីម ហុង ប្រធានគណ:កម្មាធិការរៀបចំការបោះឆ្នោតខេត្តកណ្ដាល បានរាយការណ៍ស្តីអំពីលទ្ធផលការងារនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ជូនដល់អង្គពិធី និងបានបញ្ជក់ពីសន្តិសុខសណ្ដាប់ធ្នាប់ និងសុវត្ថិភាព ក្នុងពេលដំណើរការនៃការបោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី៥ ឆ្នាំ២០២២ កន្លងកមនេះ គឺមានភាពល្អប្រសើរ និងរលូន ក្នុងពេលបោះឆ្នោត ។ លោកបន្តថា អ្នកមានឈ្មោះក្នុងបញ្ជីបោះឆ្នោត ចំនួន ៧៧៥,៨០៤ នាក់ បានមកបោះឆ្នោត ចំនួន ៦៦៣,១៣២ នាក់ ស្មើនឹង ៨៥.៤៧% សម្រាប់គណបក្សនយោបាយ ដែលបានឈ្មោះបោះឆ្នោតមានចំនួន ១២គណបក្ស ហើយគណបក្សដែលមានទទួលបានសំឡេងគាំទ្របណ្ដោះអាសន្នច្រើនជាងគេគឺគណបក្សប្រជាជនកម្ពុជា ដែលមានចំនួន ឈឈ្មោះ ១២៧ ឃុំ សង្កាត់។ ឯកឧត្ដម ណុប ដារ៉ា អភិបាលរងខេត្តកណ្ដាល ក៏បានកោតសរសើរដល់គណៈកម្មការរៀបចំការបោះឆ្នោត ព្រមទាំងកងកម្លាំងទាំងបី ក្នុងកិច្ចការដំណើរការ នៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ ។ ឯកឧត្តមអភិបាលរងខេត្ត ក៏បានជំរុញដល់ អាជ្ញាធរក្រុង-ស្រុក មន្ទីរអង្គភាពជុំវិញខេត្ត និងកងកម្លាំងប្រដាប់អាវុធគ្រប់លំដាប់ថ្នាក់ ត្រូវតែបន្តខិតខំរួមសាមគ្គីគ្នា បំពេញភារកិច្ច កាតព្វកិច្ច និងទិសដៅការងាររបស់ខ្លួនឱ្យមានប្រសិទ្ធភាព ដើម្បីឈានទៅរកការអភិវឌ្ឍន៍ និងការកសាងសមិទ្ធផលថ្មីៗឱ្យបានច្រើនបន្ថែមទៀតក្នុងខេត្ត ជាពិសេសត្រូវរួមគ្នាត្រួតពិនិត្យ ពិភាក្សាពីបញ្ហាប្រឈម ដូចជាចំណុចខ្វះចន្លោះ ដែលនៅមិនទាន់បានអនុវត្ត និងចូលរួមក្នុងការដោះស្រាយបញ្ហា ដើម្បីឱ្យបានកាន់តែល្អប្រសើរឡើង ឆាប់រហ័សទាន់ពេលវេលា ឆ្លើយតបទៅនឹងភាពអភិវឌ្ឍរីកចម្រើនរបស់ប្រទេសជាតិ សំដៅខិតខំប្រឹងប្រែងបម្រើសេវាសាធារណ:ជូនប្រជាជននៅក្នុងមូលដ្ឋានប្រកបដោយប្រសិទ្ធភាពខ្ពស់ និងទទួលបានលទ្ធផលល្អបន្ថែមទៀត។ មានមតិបិទក្នុងពិធីនោះដែរ ឯកឧត្ដម គង់ សោភ័ណ្ឌ អភិបាលខេត្តកណ្ដាល បានសម្តែងនូវការកោតសរសើរចំពោះគណបក្សនយោបាយ អ្នកសង្កេតការណ៍ជាតិ អន្តរជាតិ ភាគីពាក់ព័ន្ធព្រមទាំបងប្អូនប្រជាពលរដ្ឋទាំងអស់ ដែលបានចូលរួមអនុវត្ត និងគោរពច្បាប់បោះឆ្នោត បទបញ្ជា និតិវិធី និងក្រមសីលធម៌សម្រាប់ការបោះឆ្នោតប្រកបដោយស្មារតីទទួលខុសត្រូវ និង ភាពថ្លៃថ្នូរដែលធ្វើឲ្យការបោះឆ្នោតជ្រើសរើសក្រុមប្រឹក្សាឃុំសង្កាត់សម្រាប់អាណត្តិទី៥នេះ ទទួលបានលទ្ឋផលល្អប្រសើរទាំងលើទិដ្ឋភាពច្បាប់ និង ទិដ្ឋភាពបច្ចេកទេសក្រោមបរិយាកាសសន្តិភាព ស្ថិរភាព សន្តិសុខសណ្តាប់ធ្នាប់របៀបរៀបរយគ្មានការគំរាមកំហែងនិងគ្មានអំពើហិង្សានោះឡើយ។ ឯកឧត្ដម ក៏បានអំពាវនាវដល់ភាគីពាក់ព័ន្ធទាំងអស់ បន្តចូលរួមនៅក្នុងកិច្ចដំណើរការនៃការបោះឆ្នោតនាពេលខាងមុខទៀតប្រកបដោយភាពស្មោះត្រង់ និងការទទួលខុសត្រូវខ្ពស់សំដៅលើកកម្ពស់ដំណើរការនៃលទ្ធិប្រជាធិបតេយ្យ និងការបោះឆ្នោតនៅកម្ពុជា រក្សាបាននូវសុខសន្តិភាព ស្ថិរភាពនយោបាយ ការរក្សាបាននូវកំណើនសេដ្ឋកិច្ចខ្ពស់ដោយឈរលើស្មារតីតម្កល់ផលប្រយោជន៍ជាតិនិងប្រជាជនជាធំ ។
![](https://asset.cambodia.gov.kh/provincial/sites/29/2022/06/286449052_343674921274190_7689537226715430538_n-2.jpg)
![](https://asset.cambodia.gov.kh/provincial/sites/29/2022/06/289880049_343812264593789_5144083281768243438_n-1024x682.jpg)
![](https://asset.cambodia.gov.kh/provincial/sites/29/2022/06/290094224_343811561260526_1263605378627422043_n-1024x682.jpg)
![](https://asset.cambodia.gov.kh/provincial/sites/29/2022/06/290007808_343811584593857_6587467665992241576_n.jpg)
![](https://asset.cambodia.gov.kh/provincial/sites/29/2022/06/289894797_343811611260521_2534423039026475473_n.jpg)
![](https://asset.cambodia.gov.kh/provincial/sites/29/2022/06/289447191_343811821260500_6997849909759451267_n.jpg)
![](https://asset.cambodia.gov.kh/provincial/sites/29/2022/06/288678694_343811884593827_5616890155451119704_n.jpg)
![](https://asset.cambodia.gov.kh/provincial/sites/29/2022/06/289506425_343812337927115_4673332917446450134_n-1024x682.jpg)