+++++++++++ខេត្តកណ្តាល៖ នាព្រឹកថ្ងៃទី៤ ខែតុលា ឆ្នាំ២០២៦ ឯកឧត្តមទេសរដ្ឋមន្ត្រី ស្វាយ ស៊ីថា ប្រធានគណៈកម្មាធិការជាតិសម្របសម្រួលកិច្ចការព័ត៌មាននិងសាធារណមតិ (គ.ស.ព.ស.) និងជាអនុប្រធានក្រុមការងារចុះមូលដ្ឋានខេត្តកណ្តាល បានអញ្ជើញជាអធិបតី និងដឹកនាំវគ្គបណ្ដុះបណ្ដាលស្ដីពី «ការពង្រឹងការងារសាធារណមតិនិងការប្រឆាំងព័ត៌មានក្លែងក្លាយក្នុងយុគសម័យបញ្ញាសិប្បនិម្មិត (AI)» ដោយមានវត្តមានចូលរួមពី ឯកឧត្តម ប៉ែន បូណា ប្រធានអង្គភាពអ្នកនាំពាក្យរាជរដ្ឋាភិបាល និងជាអនុប្រធានអចិន្ត្រៃយ៍ គ.ស.ព.ស. ឯកឧត្តម នូ សាខន ប្រធានក្រុមប្រឹក្សាខេត្ត ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល មន្ទីរជុំវិញខេត្ត អាជ្ញាធរពាក់ព័ន្ធ ក្រុមការងារព័ត៌មាននិងសាធារណមតិ យុវជននៅតាមឃុំ សង្កាត់នៅទូទាំងខេត្ត រួមនឹងក្រុមការងាររាជរដ្ឋាភិបាល ចុះមូលដ្ឋានខេត្តកណ្តាល សរុបជិត ៨០០នាក់។វគ្គបណ្តុះបណ្តាលនេះ ត្រូវបានរៀបចំឡើងតាមអនុសាសន៍ណែនាំដ៏ខ្ពង់ខ្ពស់របស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមការងារចុះមូលដ្ឋានខេត្តកណ្តាលក្នុងគោលបំណងសម្រួចឆន្ទៈ និងស្មារតីទទួលខុសត្រូវ ជាពិសេសពង្រឹងសមត្ថភាពនិងលើកកម្ពស់ចំណេះដឹងរបស់មន្ត្រីទទួលបន្ទុកការងារព័ត៌មាន និងសាធារណមតិ តាមរយៈការចែករំលែកចំណេះដឹង និងបទពិសោធន៍ពាក់ព័ន្ធនឹងការវិវត្តនៃបច្ចេកវិទ្យា AI ផលប៉ះពាល់នៃព័ត៌មានក្លែងក្លាយ និងវិធីសាស្ត្រក្នុងការកំណត់អត្តសញ្ញាណក្នុងការឆ្លើយតបចំពោះព័ត៌មានទាំងនោះឱ្យបានទាន់ពេលវេលានិងកាន់តែមានប្រសិទ្ធភាព។វគ្គបណ្តុះបណ្តាលនេះមានការចូលរួមធ្វើបទបង្ហាញដោយវាគ្មិនចំនួន ២ រូប ដែលមានបទពិសោធន៍ការងារយ៉ាងទូលំទូលាយពាក់ព័ន្ធនឹងព័ត៌មាននិងសាធារណមតិ ដោយរួមមានឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី ជាប្រធានអង្គភាពអ្នកនាំពាក្យរាជរដ្ឋាភិបាល និងជាអនុប្រធានអចិន្ត្រៃយ៍នៃគ.ស.ព.ស. និងកញ្ញា ម៉ាក រ័ត្នមុនី មន្ត្រីជាន់ខ្ពស់ទទួលបន្ទុកការងារបញ្ញាសិប្បនិម្មិតរបស់លេខាធិការដ្ឋាន គ.ស.ព.ស. ។ឯកឧត្តម ស្វាយ ស៊ីថា បានបង្ហាញនូវក្តីសង្ឃឹមយ៉ាងមុតមាំថា «ចំណេះដឹងនិងបទពិសោធន៍ថ្មីៗ ដែលទទួលបានពីវគ្គបណ្តុះបណ្តាលនៅថ្ងៃនេះ នឹងជួយពង្រឹងឆន្ទៈ ការយកចិត្តទុកដាក់ និងការទទួលខុសត្រូវរបស់សិក្ខាកាមទាំងអស់ក្នុងការអនុវត្តការងារព័ត៌មាននិងសាធារណមតិឱ្យកាន់តែមានប្រសិទ្ធភាព សំដៅរួមចំណែកថែរក្សាស្ថិរភាពសង្គមនិងនយោបាយ និងសណ្តាប់ធ្នាប់សាធារណៈ ស្របពេលដែលពិភពលោកកំពុងប្រឈមមុខនឹងការវិវត្តយ៉ាងលឿនរហ័សនៃបញ្ញាសិប្បនិម្មិត»។ក្នុងវគ្គបណ្តុះបណ្តាលនេះដែរ ឯកឧត្តម គួច ចំរើន អភិបាលខេត្តកណ្តាល បានថ្លែងអំណរគុណយ៉ាងជ្រាលជ្រៅចំពោះវត្តមានរបស់ ឯកឧត្តម ស្វាយ ស៊ីថា និងក្រុមការងារ ដែលបានឆ្លៀតពេលវេលាដ៏មមាញឹក អញ្ជើញជាអធិបតីក្នុងវគ្គបណ្តុះបណ្តាលនេះ ដែលបានបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាល និងគណៈកម្មាធិការជាតិ ក្នុងការតម្រង់ទិស ជំរុញ និងលើកកម្ពស់សមត្ថភាពមន្ត្រីថ្នាក់ក្រោមជាតិ លើការគ្រប់គ្រងព័ត៌មាន ការក្តាប់សាធារណមតិ និងការឆ្លើយតបប្រកបដោយប្រសិទ្ធភាពចំពោះព័ត៌មានក្លែងក្លាយ។ ឯកឧត្តមអភិបាលខេត្ត បានបន្ថែមថា ការងារទាំងនេះ គឺជាកត្តាសំខាន់ក្នុងការរក្សាសន្តិសុខ សណ្តាប់ធ្នាប់សង្គម និងពង្រឹងទំនុកចិត្តរបស់ប្រជាពលរដ្ឋចំពោះរដ្ឋបាលគ្រប់លំដាប់ថ្នាក់ ចាប់ពីថ្នាក់ខេត្ត ក្រុង-ស្រុក រហូតដល់ឃុំ-សង្កាត់ និងរាជរដ្ឋាភិបាលកម្ពុជាទាំងមូល។ជាមួយគ្នានេះ អភិបាលខេត្ត ក៏បានលើកទឹកចិត្តដល់ លោក លោកស្រី មន្ត្រីទទួលបន្ទុកព័ត៌មាន និងក្មួយៗយុវជនឃុំ-សង្កាត់ ដែលជាសិក្ខាកាមទាំងអស់ សូមយកចិត្តទុកដាក់ស្តាប់ កត់ត្រា និងចូលរួមផ្លាស់ប្តូរមតិយោបល់ឱ្យបានផុសផុល ដើម្បីក្រេបជញ្ជក់ចំណេះដឹង និងវិធីសាស្ត្រសំខាន់ៗពីវគ្គបណ្តុះបណ្តាលនេះ យកទៅអនុវត្តក្នុងដែនសមត្ថកិច្ចរបស់ខ្លួនឱ្យមានប្រសិទ្ធភាព និងទទួលបានជោគជ័យ។